July 30

Skadustemme deur Joanne Macgregor

SkadustemmeSkadustemme deur Joanne Macgregor
Gepubliseer in 2015
Uitgewer: Protea Boekhuis
Genre: Sielkundige Riller
Bladsye: 299
Bron: Resensie-kopie van die outeur
Oorspronklike taal: Engels
Vertaal deur Elsa Silke
Samevatting:

Tussen die narkose en die wakkerword is daar die skadustemme.

“Sy is stil, ontspanne, gereed. Haar asemhaling is stadig en reëlmatig, haar blik effens ongefokus. Hy voel hoe sy eie asemhaling versnel, hoe ‘n warm gloed in hom opstyg, soos ‘n vlam van verrukking. Daar is nog net genoeg tyd om ‘n bemoedigende boodskap in haar oor te fluister voor die donker haar geheel en al in sy skeppende hande oorgee. Hy buk en praat in har oor: ‘Ontspan. Ek gaan iets baie spesiaals vir jou doen. En wanneer jy wakker word, gaan jy absoluut perfek wees.’ “

Wanneer een van sielkundige Megan Wright se pasiënte aan haar beskryf hoe sy deur ‘n ginekoloog emosioneel geteister en seksueel geskend is, besluit sy om ondersoek in te stel. Vasberade om die waarheid uit te vind en die mishandeling stop te sit, maar ook tot stilswye gedwing deur haar vertroulikheidseed, moet Megan die skadukant van ‘n gevaarlike, versteurde man ontbloot. 

Divider

Skadustemme is die vertaalde weergawe van Joanne Macgregor se debuutroman vir volwassenes, Dark Whispers. Dié sielkundige riller sit ‘n regmerkie langs elkeen van my boksies:

  • ‘n Sterk vroulike protagonist                             box_tick
  • ‘n Donker plot wat met die gedagtes smokkel   box_tick
  • ‘n Diep versteurde antagonis                             box_tick

Quote4Megan Wright is ‘n sielkundige wat sukkel om balans te vind tussen haar morele waardes en etiese verpligtinge. Een van Megan se pasiënte het ‘n mediese nagmerrie beleef. Onder narkose is haar geslagsdele geskend en die enigste ding wat sy daarvan onthou is skadustemme. Die enigste manier om haar pasiënt te help is om die nagmerrie te ondersoek. Die soektog lei Megan na ander slagoffers en ‘n dokter wat enigeiets sal doen om sy reputasie te beskerm.

Skadustemme is baie goed geskryf en ek is mal oor die gebruik van eg Suid-Afrikaanse gesegdes sowel as die vergelykings wat getrek word met ons land se huidige probleme. Dit was ‘n spannende leeservaring met ‘n sin vir humor.

Deur die loop van die roman kom Macgregor se ervaring as sielkundige duidelik na vore. Wat veral oortuigend beskryf word is die terapiesessies sowel as die verduideliking van hoe hipnose werk. Die hipnose-sessies word so boeiend beskryf dat ek soms gevoel het asof ek gehipnotiseer gaan word.Quote2

Ek het ‘n paar dinge met die antagonis in gemeen. Onder andere is hy perfeksionisties en hou daarvan om beheer te vat. Dit was inderdaad ‘n kommerwekkende oomblik toe ek besef ek deel ‘n kenmerkende eienaardigheid met die antagonis: “Hy smeer die botter van kant tot kant, egalig en tot by die randjies, sonder om die hoekies af te skeep.” Mmm… dit het my so effens laat wonder.

In die verlede het ek al baie slegte ervarings gehad met vertalings. Dit voel altyd vir my asof daar iets is wat verlore gaan. Dit was glad nie die geval met Skadustemme nie. Inteendeel, as ek nie van beter geweet het nie sou ek gedink het Skadustemme was geskryf deur ‘n Afrikaanse skrywer. Welgedaan aan Elsa Silke, dit is beslis ‘n indrukwekkende vertaling!

Ek is mal oor ‘n goeie sielkundige riller, en die een speel boonop op mens se vrees vir snydokters, beslis ‘n bonus! Skadustemme was grypend, intens en donker met ‘n bietjie humor ingemeng. Ek dink Macgregor het die potensiaal om Suid-Afrika se Gillian Flynn te wees. Ek sal beslis Skadustemme aanbeveel (of Dark Whispers, afhangende van jou taalvoorkeur).

Skadustemme word die komende Dinsdagaand, 4 Augustus, by Love Books in Melville bekend gestel. Kom maak gerus ‘n draai, miskien sien ek jou daar!

IMG_2019


Tags: , ,

Copyright © 2015. All rights reserved.

Posted July 30, 2015 by Natasha B in category "Afrikaans", "Joanne Macgregor", "Mystery Book Club", "South African Authors

2 COMMENTS :

    1. By Natasha B (Post author) on

      Ag baie dankie! Jy sal beslis nie spyt wees nie! 😀

      Reply

What are your thoughts?